کے این واصف
حج 2025 کے انتظامات کے سلسلہ کی کڑی کے طور پر وزارتِ حج و عمرہ اور “خدمت ضیوف الرحمن” پروگرام کی جانب سے عمرہ و زیارت فورم کا دوسرا ایڈیشن مدینہ منورہ کے شاہ سلمان انٹرنیشنل کانفرنس سینٹر میں 14 اپریل کو منعقد کیا جائے گا جو 16 اپریل تک جاری رہے گا۔
مقامی میڈیاکے مطابق فورم کا عنوان “عمرہ اور زائرین کے تجربے کو بہتر بنانا” رکھا گیا ہے۔ جس میں مختلف ممالک سے عمرہ سروسز کے شعبے سے تعلق رکھنے والے شرکت کریں گے۔ فورم کا مقصد باہمی تجربات کا تبادلہ کرتے ہوئے عمرہ زائرین کو فراہم کی جانے والی خدمات کے معیار کو بہتر سے بہتر بنانا ہے تاکہ زائرین کو زیادہ سہولیات فراہم کی جائیں۔
فورم میں ایک سو ممالک سے تعلق رکھنے والے 150 سے زائد اداروں کے وفود و نمائندگان شرکت کریں گے۔ فورم میں متوقع طور پر عام شرکاء کی تعداد 25 ہزار سے زائد ہوگی۔ فورم کے دوسرے ایڈیشن میں عمرہ اور وزٹ کے حوالے سے مختلف پہلوؤں پر روشنی ڈالی جائے گی۔ علاوہ ازیں فراہم کی جانے والی جدید ٹیکنالوجی پر مشتمل خدمات کے حوالے سے نمائش کا بھی اہتمام کیا گیا ہے ۔
About The Author
