جدہ (رپورٹ سید عبدالوھاب قادری) اقبال اکیڈمی جدہ (IAJ) بیرونی شاخ اقبال اکیڈمی حیدراباد کے زیرِ اہتمام ایک پُروقار اور روحانی فضا سے آراستہ نعتیہ مشاعرہ 22 نومبر 2025ء کو نائب صدر و جنرل سکریٹری اقبال اکیڈمی جدہ جناب محمد فہیم الدین صاحب کی رہائش گاہ پر نہایت عقیدت و احترام کےساتھ منعقد ہوا۔ یہ ادبی و روحانی نشست دبستانِ دکن کے ممتاز شاعر و نعت خواں، ’’بلبلِ دکن‘‘ ڈاکٹر طیّب پاشاہ قادری کی عمرہ و زیارتِ حرمین شریفین کی غرض سے حجازِ مقدس آمد کے پُرمسرت موقع پر خصوصی طور پر ترتیب دی گئی تھی۔اس مبارک و مسعود محفل کو ممتاز سعودی ادبی شخصیت جناب عبدالقدیر حسن صدیقی صاحب نبیرہ بحرالعلوم حضرت عبدالقدیر صدیقی حسرت رح کے علاوہ جناب سید جلال پاشاقادری، فرزند جلالۃ العلم حضرت سید رشید پاشا قادری صاحب رح نے بحیثیت مہمانان اعزازی اپنی جلوہ افروزی سے مزید روشن و مزین فرمایا ۔
محفل کی صدارت ممتاز محقق، ادیب اور نعت گوشاعر جناب سید وحیدالقادری عارف نے فرمائی۔ مجلس کا آغاز حافظ ہدایت اللہ توصیف خان کی پُرسوز تلاوتِ کلامِ پاک سے ہوا، جس نے محفل کو نورانیت و روحانیت سے بھر دیا۔ اس کے بعد نوجوان طالب علم مظہر فاروق علی نے علامہ اقبال کے نعتیہ اشعار اور محمد آصف قادری نے کلام اقبال بالترتیب حضور اکرم ﷺ کی بارگاہِ اقدس میں عقیدت سے لبریز افکارِ اقبال پیش کئے جنہیں سامعین نے نہایت انہماک سے پذیرائی دی۔
مشیر اعلی محمد شمیم کوثر نے مہمانوں کا پرتپاک خیرمقدم کیا اور محفل کے انتظامات کو یقینی بنایا، جبکہ معتمد اقبال اکیڈمی جدہ سید عبد الوھاب قادری نے اپنے خطبہ استقبالیہ میں مہمانانِ گرامی کا پرتپاک استقبال کیا اور نعتیہ مشاعرے کے انعقاد کی روحانی اہمیت اور اس کے پاکیزہ مقاصد پر روشنی ڈالی۔ ناظمِ محفل جناب محمد فہیم الدین نے حسب معمول اپنے منفرد علمی و ادبی اسلوب کے ساتھ نظامت کے فرائض انجام دیتے ہوئے منتخب عقیدت سے لبریز گلہائے عقیدت و مستند حوالہ جات کے ذریعے محفل کے وقار اور تاثیر میں مزید اضافہ کیا۔
محفل میں باب الحرمین جدہ کے ممتاز شعرائے کرام نے اپنے نذرانۂ عقیدت پیش کئے، جن میں افسر بارہ بنکوی، اطہرعباسی، محمد فرحت اللہ خان، تاشفین سید، سید افضل الدین، نوشاد عثمان کرام شامل تھے۔ ہر شاعر نے اپنے مخصوص انداز میں عشقِ رسول ﷺ کے رنگ، حلاوت اور روحانیت سے بھرپور کلام پیش کیا، جس نے محفل کو وجدانی فضا سے معمور کر دیا۔
مہمانِ خصوصی جناب طیب پاشا قادری نے اپنی مترنم اور دلنشین آواز میں اپنے نعتیہ کلام کے ذریعہ محفل میں روحانی کیف و سرور کی کیفیت پیدا کر دی۔ حاضرین کی درخواست پر انہوں نے اپنے والدِ محترم، دبستانِ دکن کی معروف شخصیت بےہوش محبوب نگری کی شہرۂ آفاق دکنی نعت بھی پیش کی، جسے سامعین نے بےحد محبت و عقیدت سے سنا اور سراہا اور بارہا مشاعرہ گاہ سبحان اللہ کی صداؤں سے گونج اٹھی۔
صدرِ محفل جناب سید وحید القادری عارف صاحب نے دو پُرلطف نعتیہ تخلیقات—ایک تازہ اور ایک قدیم نعت شریف سنائی، جنہیں سامعین نے بےحد پسند کیا اور ہر شعر پر داد و تحسین کی گونج سنائی دی۔ انہوں نے اپنے جدِّ امجد حضرت مفتی سید عبد الرشید قادری اختر علیہ الرحمہ کی ایک نہایت خوبصورت نعت شریف بھی سنائی، جس نے محفل میں ایک روحانی، محبت بھرا اور دلوں کو چھو لینے والا ماحول پیدا کر دیا۔
شعر کی ادا میں رچی ہوئی عقیدت اور وراثتی نسبت نے سامعین کے دلوں کو گہرائی تک متاثر کیا، اور محفل میں بھرپور داد و تحسین کی گونج سنائی دی۔
محفل میں علمی، ادبی، مذہبی اور سماجی شخصیات کی شرکت نے تقریب کو مزید وقار بخشا۔ جناب عارف قریشی، ڈاکٹر امجد جنیدی ،جناب مبصر الاعظم، جناب محمد نواز جنجوعہ، جناب احمد باشا اور دیگر معزز مہمانانِ گرامی کی موجودگی محفل کی رونق میں اضافہ کا باعث بنی۔
تقریب کے کامیاب انعقاد میں اقبال اکیڈمی جدہ کی پوری ٹیم نے بھرپور محنت اور ہم آہنگی کا مظاہرہ کیا۔ جوائنٹ سکریٹری توصیف خان اور میڈیا ٹیم کے اراکین محمد آصف قادری، عبدالرحمٰن نے یوٹیوب کے ذریعے لایؤ نشریات کو یقینی بنایا جس کی بدولت بر اعظم ایشیا ، امریکا وغیرہ سے راست مشاہدہ ممکن ہوسکا۔،انکے علاوہ معزز اراکین ریاض احمد ،مرتضیٰ شریف صابر، معراج علی اور سلمان جبران نے مؤثر اور متحرک خدمات انجام دیں۔ دیگر خیر خواہان فصیح الدین فہیم، فراز احمد کے بشمول دیگر افراد نے بھی رضاکارانہ خدمات انجام دیں ۔
محفل ایک نہایت پُرنور اور روحانی سرشاری کی کیفیت میں جناب محمد نواز جنجوعہ کے سلام بحضور خیر الانام ﷺ پیش کرنے اور محترم جلال پاشا صاحب کی رقت انگیز دعا اور پر تکلف عشائیہ کے ساتھ اختتام پذیر ہوئی۔
شرکاءِ محفل نے اسے یادگار، مؤثر اور عشقِ رسول ﷺ سے معمور نشست قرار دیتے ہوئے اقبال اکیڈمی جدہ کی اس خوبصورت کاوش کو دل کی اتھاہ گہرائیوں سے خراجِ تحسین پیش کی-
تقریب کی رونق میں مزید اضافہ اس امر سے بھی ہوا کہ محفل کو مختلف شہروں سے بھی خصوصی توجہ حاصل رہی۔ حیدرآباد (انڈیا) سے صدر اقبال اکیڈمی جدہ جناب سید محمود ہاشمی، صدر اقبال اکیڈمی حیدرآباد (انڈیا) جناب ضیا الدین نیّر، جناب محمد عبدالمجیب صدیقی ، متحدہ عرب امارات (یو اے ای) سے جناب محمد عبد الحق ہاشم ، اور دیگر شخصیات نے یوٹیوب پر براہِ راست مشاعرہ ملاحظہ کیا۔ انہوں نے اس روحانی نشست پر انتہائی مسرت کا اظہار کرتے ہوئے اقبال اکیڈمی جدہ کی پوری ٹیم کو اپنے دلی مبارکباد اور نیک خواہشات پیش کیں
About The Author
