اردو اکیڈمی جدہ کا گیارہواں سہ ماہی پروگرام شاندار انداز میں منعقد، تمثیلی مشاعرہ اور طلبہ کی پذیرائی - ٹائمز آف این آر آئیز

اس موقع پر تمثیلی مشاعرہ، سی بی ایس سی امتحانات میں امتیازی کامیابی حاصل کرنے والے طلبہ و طالبات کی پذیرائی، اور انٹرنیشنل انڈین اسکول جدہ کے چیئرمین ڈاکٹر محمد عبدالسلیم کی تہنیت پیش کی گئی۔

جدہ: اردو اکیڈمی جدہ کے زیر اہتمام انٹرنیشنل انڈین اسکول جدہ (گرلز سیکشن) میں اکیڈمی کا گیارہواں سہ ماہی پروگرام نہایت شاندار اور کامیاب انداز میں منعقد ہوا۔ اس موقع پر تمثیلی مشاعرہ، سی بی ایس سی امتحانات میں امتیازی کامیابی حاصل کرنے والے طلبہ و طالبات کی پذیرائی، اور انٹرنیشنل انڈین اسکول جدہ کے چیئرمین ڈاکٹر محمد عبدالسلیم کی تہنیت پیش کی گئی۔

پروگرام کا روح پرور آغاز

پروگرام کا آغاز حافظ محمد نظام الدین غوری (معتمد نشر و اشاعت) کی تلاوتِ کلامِ پاک سے ہوا، جس کے بعد نائب صدر اکیڈمی سید محمد خالد حسین مدنی نے نعتِ رسول مقبول ﷺ پیش کی۔ پروگرام کی نظامت کے فرائض اسلم افغانی (پروگرام کوآرڈینیٹر) نے بہترین انداز میں انجام دیے۔

استقبالیہ اور تعلیمی خدمات پر اظہارِ خیال

اکیڈمی کے صدر حافظ محمد عبدالسلام نے استقبالیہ کلمات ادا کرتے ہوئے اکیڈمی کی اردو زبان کے فروغ کے لیے کی جانے والی کاوشوں کو اجاگر کیا اور تمام مہمانوں، اساتذہ، والدین اور شرکاء کو خوش آمدید کہا۔ پروگرام کے مہمانِ خصوصی ڈاکٹر محمد عبدالسلیم کو ان کی تعلیمی خدمات، طلبہ کی فلاح و بہبود میں دلچسپی اور اردو زبان سے محبت کے اعتراف میں شال، گلدستہ اور ’تمغہ اعترافِ خدمات‘ پیش کیا گیا۔

مختلف تعلیمی اور تفریحی سرگرمیاں

پروگرام میں ڈاکٹر مرزا قدرت نواز بیگ نے انگریزی سے اردو الفاظ معانی، حافظ محمد نظام الدین غوری نے اردو سے اردو معانی، جبکہ سید عبدالوہاب قادری نے "ادھورے اشعار مکمل کریں” جیسی دلچسپ سرگرمیوں کا انعقاد کیا، جس میں شرکاء کو تحائف سے نوازا گیا۔

دلکش تمثیلی مشاعرہ

پروگرام کی سب سے پرکشش نشست "تمثیلی مشاعرہ” رہی، جس میں طلبہ و طالبات نے معروف اردو شعراء کا انداز اپناتے ہوئے ان کے اشعار پیش کیے۔ لباس، اندازِ بیان اور تلفظ نے مشاعرہ کو ایک حقیقی ادبی محفل بنا دیا۔ حاضرین نے اس نشست کو بے حد سراہا۔

امتیازی طلبہ و طالبات کی پذیرائی

پروگرام کے اختتام پر اردو زبان اور سی بی ایس سی امتحانات میں امتیازی کامیابی حاصل کرنے والے دسویں اور بارہویں جماعت کے طلبہ و طالبات کو ’تمغہ شرکت‘ اور ’تمغہ حُسنِ کارکردگی‘ سے نوازا گیا۔

مختلف شخصیات کی شرکت اور تاثرات

پروگرام میں جدہ کی ممتاز تعلیمی، ادبی اور سماجی شخصیات نے شرکت کی جن میں ڈاکٹر مفتی پرنس ضیاء، محترم مہتاب قدر، انجینئر خواجہ محی الدین، محمد فاروق، قمر سادہ بھٹکل، سید افضل نقشبندی، اور دیگر شامل تھے۔ شرکاء نے اردو زبان کے فروغ کے لیے ایسی تقریبات کو وقت کی ضرورت قرار دیا۔

شکریہ اور انتظامات

پروگرام کے اختتام پر ڈاکٹر خواجہ یامین الدین (معزز رکن اکیڈمی) نے تمام مہمانوں، شرکاء اور منتظمین کا شکریہ ادا کیا۔ دارالعلم جدہ کے اراکین محمد وسیم، محمد جعفر، محمد سمیر، حافظ محمد ذیشان علی، اور محمد عزیر شہباز نے انتظامات میں بھرپور تعاون کیا۔